عن العادة الجنسية AKA السرية

"أول مرة أعرف إن فيه حاجة اسمها عادة جنسية كانت وأنا عندي 21 سنة، كنت عارفة إني لما ألمس الجزء ده باحسّ بنوع من أنواع اللّذة بس مش عارفة ده يعني إيه ولا إيه بيحصل. "

قالت سهير محمد.

في 2016 كنت باشتغل في برنامج تيلفزيوني للتوعية بالصحة النفسية والجنسية، وكان في حلقة هانشتغل عن العادة السرية، ساعتها الدكتورة اللي أنا شغالة معاها زعقتلي جامد وقالتلي اسمها العادة الجنسية، هي مش فعل سيّء الناس تستخبّى منه ويتسمّى بالسرية.

وأنا بادوّر على المعلومات عشان الحلقة لقيت إن العادة الجنسية ليها أضرار كتير، أحياناً بتوصّل للموت وأوقات بتسبّب العمى، والحقيقة أنا درست طب ست سنين عمري ما سمعت عن حاجة زي دي.

للأسف كل المحتوى العربي الموجود مليان معلومات مغلوطة، مش بس كده لو انت من سوء حظك ماكنتش بتعرف إنجليزي فللأسف هتكون معرّض للضلالات دي.

من المعلومات مثلاً اللي أنا لاقيتها إنه من أضرار العادة الجنسية الآتي:

1- يؤدّي إلى تورُّم القضيب

ده مش حقيقي، تورُّم القضيب ده ممكن يكون بسبب عدوى، لكن الإمتاع الذاتي (العادة الجنسية) مالوش أي علاقة بتورُّم القضيب.

2- ضعف النظر

مفيش أي علاقة لا قريبة ولا بعيدة بين النظر والجهاز التناسلي في الأنثى أو الذكر، لو ده صح كان زمان الناس ماشية تقول في الشارع على كل واحد/ة أعمى/عميا أو لابس/ة نضارة إنه ده بسبب  ممارسة العادة الجنسية.

3- خشونة الركبة

سبب خشونة الركبة هو تآكل السائل الزلالي الموجود في المفاصل، فبيزيد الاحتكاك بين العضم، طبعاً ده مالوش أي علاقة بالعادة الجنسية.

4- البرود الجنسي

قريت على موقع من اللامؤاخذة بيقول إن الستات لما بتمارس العادة الجنسية بيجيلها برود جنسي، الختان هو اللي بيجيب برود جنسي مش العادة الجنسية خالص.

5- عدم القدرة على النوم

ده برضو معلومة مغلوطة، ممارسة العادة الجنسية بتساعد الأشخاص على الاسترخاء فبيعرفوا يناموا كويس ولساعات طويلة مش نوم متقطّع.

6- العقم

الإمتاع الذاتي مالوش أي علاقة بالعقم، بالعكس بيحكي بعض الشركاء إنهم بيحبوا شركائهم يمارسوا العادة الجنسية قدامهم وبيستمتعوا جداً بالعلاقة الجنسية بعدها، وبيحملوا عادي جداً لو هما عايزين ده.

للأسف الأشخاص اللي بيدوّروا في المحتوى العربي بيعانوا من اضطرابات نفسية كتير، سببها المحتوى نفسه، كوني بامارس فعل معيّن وكل المعلومات دي موجودة عنّه وأنا مصدّقاها عشان ماعنديش مصدر تاني بيقول معلومات صحيحة، وطبعاً ده غير التحريم والأساطير الكتيرة حوالين ممارسة العادة الجنسية الموجودة في كل الأديان.

دول كانوا أشهر الحاجات اللي قريتها، لقيت طبعاً حاجات كتير تانية وبرضو غلط، بس دول الأشهر على الإطلاق.

بس قبل ما تمارس/ي العادة الجنسية فيه 5 حاجات لازم تاخد/ي بالك منهم:

- أول حاجة لازم تكون/ي بتعتني بنظافتك الشخصية بشكل كويس.

- لازم إيديك/ي تكون مغسولة كويس جداً.

- لو هتستخدم/ي لعب جنسية أثناء الاستمتاع الذاتي، لازم تكون اللعب دي بتاعتك انت/ي بس، ولازم برضو تكون نضيفة.

- مهم تاخد/ي شاور بعد ما تخلص/ي.

- اختار/ي مكان كويس وهادي ومريح ومتعملهاش بعنف، ومن أجل استمتاع أكتر استخدم/ي مُزلق حميمي.

 

بس خد/ي بالك، لو كلت/ي بطاطس محمرة كتير كل يوم بكمية كبيرة هتتخن/ي، ولو مارست/ي العادة الجنسية كتير ممكن تتحول لإدمان.

يعني إيه الكلام ده؟

يعني الاحتياجات الجنسية مهم إشباعها، بس الإسراف في الإشباع مضرّ.

إدمان العادة الجنسية:

لو أسرفت/ي في ممارسة العادة الجنسية الموضوع هيتحول لمرض، وهتبدأ حياتك كلها تقف على الفعل ده. بيحكي "آسر عادل" إنه كان بيقضّي اليوم بس وهو بيمارس العادة الجنسية، بطّل يخرج عشان هو بيكون مرتاح طبعاً في البيت، والموضوع طوّل واتحوّل لإنه بطّل يروح الجامعة وبطّل يذاكر لغاية ما سقط بالفعل في الجامعة.

هنا التعامل مع العادة الجنسية بيتحول من فعل بيسبّب لذة وإمتاع إلى فعل اعتيادي لازم ممارسته يومياً، زي لما تتعود/ي على الكافيين كل يوم فلما تبطّل/ي تشرب/ي قهوة تلاقي نفسك مصدّع/ة، بس الفرق هنا إن التعوُّد على القهوة مش هيخليك/ي تهمل/ي باقي حياتك بعكس إدمان العادة الجنسية.

ولو وقعت/ي في الفخ ده بننصحك تروح/ي لأقرب دكتور نفسي أو معالج نفسي، ومتخافش/يش من الوصمة المجتمعيّة، لو الدكتور حكم عليك/ي غيّره/يه فوراً، لأن ده معناه إن الدكتور مش فاهم شغله كويس.

 

آه.. نسينا نقول حاجة مهمة، إيه بقى الفوائد اللي بترجعلك لو مارست/ي العادة الجنسية؟

العادة الجنسية بتقلّل الضغط العصبي جداً وبتساعدك على الاسترخاء، وكمان فيه أبحاث كتير بتقول إنها بتقلّل من نسبة الإصابة بسرطان البروستاتا لأن السائل المنوي بيخرج فغيره بيتكون وهكذا. مش بس كده، هي كمان وسيلة لاكتشاف جسمك والتعرُّف عليه، وعشان تعرف/ي إيه هو إحساس المتعة ويعني إيه لذّة جنسية.

وفي واحدة من الدراسات لقينا إن نسبة ممارسة العادة الجنسية عند الذكور حوالي 95%، بينما في الستات وصلت لـ89%، وده يخلّيك/ي تطّمن/ي أكتر إنه لو فعل مضر مش هنلاقي كل النِسب دي من الممارسات موجودة، انت/ي مش لوحدك يعني.

 

العادة الجنسية مش بديل للعلاقة الجنسية الكاملة:

مهم إنك تعرف/ي إن العادة الجنسية هي فعل مختلف تماماً عن العلاقة الجنسية الكاملة، مفيش حد فيهم بديل للتاني وكل واحد فيهم ليه إحساس مختلف ونشوة مختلفة.

سبب من أسباب انتشار العادة الجنسية في المجتمعات العربية، هو عدم وجود علاقات جنسية خارج إطار الزواج فالأشخاص بيمارسوا ده كبديل، وكمان بسبب انتشار خرافات متعلّقة بغشاء البكارة والعذريّة.

 

طيب تعمل/ي إيه لو عاوز/ة تقرأ/ي معلومات أكتر ومش لاقي/ة مصدر كويس؟

برغم قلة أو ندرة المحتوى العربي، إلا إن فيه عدد من المواقع بتقدّم محتوى جيد جداً، زي "ويكي الجندر" و"الحب ثقافة" و"اختيار"، المواقع دي مصرية الجنسية والمحتوى مُصاغ بشكل علمي، فيه كمان موقع "مشروع الألف" في لبنان، ومجلة "كحل" منطقة الشرق الأوسط وجنوب شرق آسيا وشمال أفريقيا، ومنتدى "الجنسانيّة" في فلسطين.

حوارّ مع صديقي الغيري

المقالة السابقة

نشوء الوعى

المقالة التالية

قد تحب أيضاً

من نفس النوع