ازاي تقابل الناس من غير ما تبات في القسم

طبعا كلنا عارفين ان تطبيقات المواعدة موجودة عند نسبة كبيرة جدا من المثليين في مصر واكيد برضو كلنا عارفين انه بقي خطر اكتر الايام دي اكتر من قبل كده.

طب هل وانت بتكلم حد بتقعد تفكر وتحسب هل الشخص دا امان ولا كمين؟ أو هل دا البروفايل بتاعه فعلا ولا سارق صور حد؟ المشكلة ان مفيش اي حاجة تقدر تأكدلك بنسبة 100% هل في خطر من الشخص دا ولا لأ. بس في كام نصيحة كده لو عملت بيهم بنسبة كبيرة هتبقي في امان.

 

-الصور بحركات مختلفة.

طبيعي ان اي اتنين بيتكلموا علي اي ابلكيشن مواعدة لازم يشوفوا صور بعض، اكيد مش هتقابل حد من غير صورته بس الفكرة بقي انك انت اللي تختار الصورة تبقي عاملة ازاي، يعني مثلا تقوله "عايز صورة ليك وانت رافع 3 صوابع او وانت عامل حركة كذا" الحاجات دي مثلا وهو لو طلب منك دا يبقي برضو حقة صور وابعتلة زي ما هو عمل كده.

 

-رقم الموبايل.

رقم موبايل الشخص اللي بتكلمة حاجة أساسية ولو حد قالك مش ببعت رقم موبايلي فكك منه او اقلبه علي طول دا كده متضيعش وقتك معاه، طب دلوقتي انت طلبت رقم موبايل حد وبعتهولك حد وعايز تعرف ايه المطلوب منك انك تعملة؟ بص يا سيدي لازم يبقي عندك ابلكيشن truecaller و Sync.me اول ما بتاخد الرقم بتعمل عليه سيرش ع الاتنين دول بس انا بفضل اكتر sync.me لانه بيجيبلك بيانات اكتر عن الشخص زي الفيسبوك وتويتر ولو معاه رقم تاني وشغلة وعنوانة وحاجه كده من الاخر، لو عملت بحث بالرقم ولقيت بياناته يبقي كده انت ماشي تمام لكن لو ملقتش اي بيانات يبقي الرقم دا جديد والموضوع مقلق شوية ومش واضح.

 

-السوشيال ميديا.

مفيش حد دلوقتي معندوش فيسبوك او انستجرام او ع الاقل واحد منهم، بس انا بنصح اكتر بالانستجرام ،تاخد اكونت الانستجرام بتاعة وتدخل تعملة فولو لو الاكونت برايفت وتدخل تكلمه عليه ويرد عليك عشان تتاكد ان هو دا الشخص مش سارق صور حد ولو لقيت حد من صحابك عنده اسالهم عليه ميضرش يمكن تلاقيهم نازلين بالCV بتاعه كله، ولو عرفت توصل للفيسبوك من الطريقة اللي في النقطة اللي فوق اتفرج ع الاكونت بتاعة وشوف آراءة عاملة ازاي وبيفكر ازاي وبيعمل شير لايه وكده يعني.

 

-اخيرا، متوقفش في الشارع ومتروحش البيت من اول مرة!

حتي بعد ما تتأكد وتعمل بكل النقط اللي فوق دي وانت رايح تقابل حد اول مره حاجتين اوعي تتنازل عنهم عشان امانك الشخصي

"متروحش البيت من اول مرة" اقعد مع الشخص في مكان عام واتكلموا عن اي حاجه ، النقطة الاهم" اوعي توقف في الشارع تستني حد" لو السما اتطبقت علي الارض متوقفش في الشارع ابدا عشان كل النقط دي احنا قولنا من الاول خالص مفيش حاجه اسمها نسبة الامان 100%، الفكرة لو طلع كمين مثلا وانت كنت واقف في الشارع نسبة ان حد يخرجك براءة صعبة لكن لو انت في كافية ومنضف موبايلك كويس، بكرر ومنضف موبايلك كويس لو طلع كمين وجه قبض عليك من جوه الكافية نسبة انك تخرج براءة كويسة جدا خصوصا لو كان في كاميرات مراقبة في الكافيه، انت قاعد في كافية في حالك و واحد جه قبض عليك من غير اي وضع مخل وموبايلك مفيش عليه ابلكيشن للمثليين او شات بينك وبينه يبقي خلاص كده انت في السليم. 

الناجون الأوائل

المقالة السابقة

حادثة قطع الكاندوم

المقالة التالية

قد تحب أيضاً

من نفس النوع